កំពង់ស្ពឺ៖ នៅល្ងាចថ្ងៃទី១២ ខែកក្កដា ឆ្នាំ២០២១ មុននេះបន្តិច រដ្ឋបាលខេត្តកំពង់ស្ពឺ បានធ្វើការជូនដំណឹងទៅកាន់ប្រជាពលរដ្ឋដែលរស់នៅក្នុងភូមិសាស្រ្តក្រុងច្បារមន ខេត្តកំពង់ស្ពឺ ជាពិសេសប្រជាពលរដ្ឋរស់នៅជុំវិញ "ផ្សារកំពង់ស្ពឺ" អំពីការផ្អាកដំណើរការអាជីវកម្មបណ្តោះអាសន្ន ក្រោយរកឃើញមានអាជីវករក្នុងផ្សារកំពង់ស្ពឺ មានវិជ្ជមានកូវីដ-១៩។
ក្នុងសេចក្តីសម្រេចនោះបានបញ្ជាក់ថា រដ្ឋបាលខេត្តកំពង់ស្ពឺ បានសម្រេចផ្អាកដំណើរការអាជីវកម្មជាបណ្តោះអាសន្ន សម្រាប់ផ្សារកំពង់ស្ពឺ ដែលមានទីតាំងស្ថិតនៅ ភូមិ ពាណិជ្ជកម្ម សង្កាត់ រកាធំ ក្រុងច្បារមន ខេត្តកំពង់ស្ពឺ ចាប់ពីថ្ងៃទី១២ ខែកក្កដា ឆ្នាំ២០២១ រហូតដល់ថ្ងៃទី២៥ ខែកក្កដា ឆ្នាំ២០២១។
អាជ្ញាធរខេត្តក៏បានអំពាវនាវឱ្យសន្តិសុខ បុគ្គលិក-កម្មករ អាជីវករ អតិថិជន និងអ្នកពាក់ព័ន្ធទាំងអស់ ត្រូវចូលរួមសហការជាមួយអាជ្ញាធរមូលដ្ឋាន មន្រ្តីជំនាញ និងមន្រ្តីសុខាភិបាល ដើម្បីទៅយកសំណាកវិភាគរកមេរោគ និងត្រូវធ្វើចត្តាឡីស័កឱ្យបានត្រឹមត្រូវតាមការណែនាំរបស់ក្រសួងសុខាភិបាល៕
សម្រាប់ព័ត៌មានលម្អិតសូមអានសេចក្តីសម្រេចរបស់រដ្ឋបាលខេត្តកំពង់ស្ពឺនៅខាងក្រោម៖
